سعودی ولی عہد شہزادہ محمد بن سلمان آج پاکستان میں اپنا انتہائی مصروف ترین دن گزاریں گے جس میں صدر پاکستان ڈاکٹرعارف علوی سعودی ولی عہد شہزادہ محمد بن سلمان کے اعزاز میں ظہرانہ دیں گے۔
ایوان صدر میں سعودی ولی عہد کے اعزاز میں ظہرانہ دیا جائے گا اور شہزادہ محمد بن سلمان کو پاکستان کے اعلیٰ ترین ایوارڈ نشان پاکستان سے نوازا جائے گا۔
سعودی ولی عہد شہزادہ محمد بن سلمان کی صدر مملکت ڈاکٹر عارف علوی، آرمی چیف جنرل قمر جاوید باجوہ، چیئرمین سینیٹ صادق سنجرانی اور اسپیکر قومی اسمبلی اسد قیصر سے ملاقاتیں ہوں گی۔
شہزادہ محمد بن سلمان آج سہ پہر3 بجے دورہ مکمل کرکے روانہ ہوں گے، وزیراعظم عمران خان اور کابینہ اراکین معزز مہمان کو نورخان ایئربیس سے رخصت کریں گے۔
یاد رہے کہ گزشتہ روز سعودی ولی عہد شہزادہ محمد بن سلمان 2 روزہ دورے پر پاکستان پہنچے تھے، وزیراعظم عمران خان سمیت وفاقی کابینہ کے ارکان اورآرمی چیف نے نورخان ایئربیس پر ان کا استقبال کیا تھا۔
وزیراعظم عمران خان سعودی ولی عہد کی گاڑی خود ڈرائیو کررہے تھے، وہ گاڑی ڈرائیو کرکے وزیراعظم ہاؤس لے کر گئے، وزیراعظم ہاؤس پہنچنے پر شہزادہ محمد بن سلمان کو21توپوں کی سلامی دی گئی اور گارڈ آف آنر پیش کیا گیا تھا۔
وزہراعظم عمران خان کی جانب سے دیے گئے عشایے میں خطاب کرتے ہوئے سعودی ولی عہد شہزادہ محمد بن سلمان کا کہنا تھا کہ پاکستان آکر بہت خوش ہوں، ہمارے پاکستان کے ساتھ دوستانہ تعلقات ہیں۔
وزیراعظم پاکستان نے سعودی ولی عہد سے حاجیوں کے مسائل اورسعودی عرب میں قید پاکستانیوں سے متعلق درخواست جس پر سعودی ولی عہد نے اس بات کی یقین دہانی دلوائی کہ وہ ان مسائل کو جلد حل کریں گے.
