فیس بک اور ای میل اکاؤنٹ کیسے ہیک ہوتے ہیں؟
بہت سے لوگ یہ دعویٰ کرتے ہیں کہ وہ فیس بک اکاؤنٹ وغیرہ ہیک کر دیتے ہیں لیکن ایسا کچھ بھی نہیں ہوتا ہمیشہ یہی نتیجہ دیکھنے کو ملتا ہے کہ جس کا اکاؤنٹ ہیک ہوا وہ اس کی اپنی غلطی سے ہوا۔ یاد رکھیں کہ آپ صرف اور صرف اپنی کم علمی کی وجہ سے اپنا اکاؤنٹ ہیک کرواتے ہیں اور دوسرے صرف اور صرف معلومات ہونے کی وجہ سے اکاؤنٹس ہیک کرنے میں کامیاب ہو جاتے ہیں۔
پاسورڈز
اکثر لوگ نہ صرف کمزور پاس ورڈ استعمال کرتے ہیں بلکہ ایک ہی پاسورڈ ایک سے زیادہ اکاؤنٹس کے لیے بھی استعمال کرتے ہیں.
گزشتہ سالوں میں بڑی سے بڑی ویب سائٹس جیسے کہ لنکڈاِن اور یاہو وغیرہ کے پاس ورڈ ڈیٹا بیس لیک ہو چکے ہیں۔ اس لیے ہر اکاؤنٹ کے لیے الگ پاسورڈ استعمال کریں اور ایسا پاسورڈ جس پر آپ کو ذرا سا بھی شک ہو کہ وہ کسی کو معلوم ہے بالکل استعمال مت کریں اور پاسورڈ میں ہمیشہ نمبرز اور اسپیشل کیریکٹرز شامل رکھیں تاکہ انھیں کریک کرنا انتہائی مشکل ہو جائے۔
یاہو کا پاسورڈ ڈیٹا بیس لیک ہونے پر پتا چلا کہ ہزاروں لوگ یہ سادہ سے پاسورڈ ز استعمال کر رہے تھے.
password, welcome, qwerty, monkey, Jesus, love, money, freedom, ninja, writer
کسی بھی ای میل اکاؤنٹ کے ہیک ہونے میں سیکیورٹی کا بہت بڑا ہاتھ ہوتا ہے زیادہ تر لوگوں کے اکاؤنٹس انھیں جاننے والے ہی ہیک کرتے ہیں فرض کریں کہ میرا سیکیورٹی سوال ہے ’’میرا بچپن کا بہترین دوست کون ہے؟‘‘ تو ظاہر سی بات ہے اس کا جواب میرے جاننے والے لوگ باآسانی بوجھ سکتے ہیں۔
موبائل فون نمبر
آج کل تقریباً ہر بڑی ای میل سروس اور فیس بک اکاؤنٹ میں اپنا موبائل فون نمبر شامل کیا جا سکتا ہے تاکہ اگر خدانخواستہ آپ کے اکاؤنٹ کے ساتھ کوئی مسئلہ ہو جائے تو فون نمبر استعمال کرتے ہوئے اکاؤنٹ واپس حاصل کیا جا سکے اس لیے اپنے اکاؤنٹ میں فون نمبر ضرور شامل رکھیں اور ایسا نمبر شامل رکھیں جو آپ ہی کے پاس موجود ہو اگر آپ اپنا نمبر بدلیں تو اپنے اکاؤنٹ میں بھی اسے بدلنا مت بھولیں۔
متبادل ای میل
اکثر ایسا تجربہ ہوا کہ اپنے اکاؤنٹس میں متبادل ای میل کے طور اپنا کوئی دوسرا ای میل ایڈریس ہی شامل نہیں ہوتا ایسا بھی ہوتا ہے کہ کسی دوسرے سے اکاؤنٹ بنوا لیا اور استعمال کرنا شروع کر دیا اپنے اکاؤنٹ میں درست متبادل ای میل ایڈریس شامل رکھنا بھی ضروری ہے تا کہ پاسورڈ ری سیٹ کرنے کی درخواست اس پر موصول کی جا سکے۔
اگر آپ کو ایسا لگے کہ اکاﺅنٹ کو کسی نے استعمال کیا ہے تو……..
سب سے پہلے مینیو میں جاکر سیٹنگز پر کلک کریں۔
اس کے بعد سیکیورٹی اینڈ لاگ ان میں چلے جائیں اور پھر Where You’re Logged In وہاں ان تمام ڈیوائسز کی فہرست سامنے آجائے گی جن پر یہ اکاﺅنٹ لاگ ان ہوا ہوگا اور ان کی لوکیشن بھی دیکھی جا سکتی ہے۔
فیس بک اور دیگر ای میلز سروسز کی سیکیورٹی انتہائی سخت ہے۔ آج سے چند سال پہلے جیسی صورت حال تھی اب ایسا نہیں ہے کسی کا بھی اکاؤنٹ ہیک کرنا کوئی آسان بات نہیں رہا.
